ಮಾತನಾಡುತ್ತೇವೆ...

-----------------------------------------------------------
ಯಾವುದೇ ದೋಷವಿಲ್ಲವಂತೆ
ಸರಿಗತ್ತಲ ರಾತ್ರಿಯಲ್ಲಿ ಸ್ಖಲಿಸಿದವನಿಗೆ
ಆದರೆ ನೋವುಂಡು ನಗುವ ಹೆಣ್ಣಿಗೆ
ತಿಂಗಳ ಮುಟ್ಟು ಮೈಲಿಗೆ.

ಮೈಯ ಕಸುವು ತೊಡೆಗಿಳಿಸಿ
ಉಸ್ಸೆಂದು ತಿರುಗಿ ಮಲಗಿ ಬೆವರು ಒರೆಸಿಕೊಂಡವನಿಗೆ
ಮತ್ತೇ ಈಜುವ ತವಕ.
ನವಮಾಸ ಹೊತ್ತು
ಜೀವಮಾನದ ನೋವುಂಡು ಹೆರುವ ಹೆಣ್ಣಿಗೆ
ಬಾಣಂತಿ ಸೂತಕ.

ಸತ್ತ ಮಡದಿಯ ಸಮಾಧಿಯ ಮಣ್ಣು ಆರಿಲ್ಲ
ಹಾಲುಗಲ್ಲದ ಕಂದಮ್ಮಳಿಗೆ
ಮತ್ತೊಬ್ಬ ಅಮ್ಮಳನ್ನು ತಂದೇಬಿಟ್ಟ..
ಅರಿಸಿನದ ಘಾಟು ಆರುವ ಮುನ್ನವೇ
ಗಂಡನ ಕಳೆದುಕೊಂಡವಳಿಗೆ ವಿಧವೆಯ ಪಟ್ಟ.

ಬರಿಯೊಡಲಿಗೆ ಬಡಬಾಗ್ನಿಯ ಕಿಚ್ಚಿಟ್ಟು
ಕಿಬ್ಬೊಟ್ಟೆಯ ನೋವುಂಡಾಗ,
ಉನ್ಮತ್ತದ ಉತ್ತುಂಗದಲ್ಲಿ
ಎವೆ ಮುಚ್ಚಿದ ಕಣ್ಣೀರ ಹನಿ ದಿಂಬು ತೋಯಿಸಿ
ಒದ್ದೆಯಾಗಿಸಿದಾಗ... ಮೈಯ ಮುದ್ದೆಯಾಗಿಸಿದಾಗ
ಮೈಲಿಗೆಯ ಮಾತಿಲ್ಲ.. ಸೂತಕದ ಸದ್ದಿಲ್ಲ..

ಮಾತನಾಡಬೇಡೆಂದಿರಿ... ದನಿಯೆತ್ತಲಿಲ್ಲ
ತಲೆ ತಗ್ಗಿಸೆಂದಿರಿ.. ತಲೆಯೆತ್ತಲಿಲ್ಲ
ಉಸಿರು ಬಿಡಬೇಡೆಂದಿರಿ.. ಅತ್ತದ್ದೂ ಕೇಳಿಸಲಿಲ್ಲ..
ಗಂಡಸಿಗೆ ಸರಿಸಮಳಲ್ಲವೆಂದಿರಿ.. ಹೌದೆಂದೆವು
ಸ್ವಾತಂತ್ರ್ಯವಿಲ್ಲವೆಂದಿರಿ.. ಸರಿಯೆಂದೆವು
ಹುಟ್ಟಿನ ಬಗ್ಗೆ ಮಾತನಾಡಿದಿರಿ.. ತಿರುಗಿ ಮಾತನಾಡಲಿಲ್ಲ
ಆದರೀಗ..

ಮುಟ್ಟಿನ ಬಗ್ಗೆ ಮಾತನಾಡುತ್ತಿದ್ದೀರಿ..
ಮಾತನಾಡುತ್ತೇವೆ..
ಹೆಣ್ತನಕ್ಕೆ ಘಾಸಿ ಮಾಡುವ ನಿಮ್ಮ ವಿರುದ್ಧ ಮಾತನಾಡುತ್ತೇವೆ.
ನಾವು ಮುಟ್ಟಲಾಗದ ನಿಮ್ಮ ಅಸ್ಪøಶ್ಯ ದೇವರ ವಿರುದ್ಧ ಮಾತನಾಡುತ್ತೇವೆ.