ಕಿವಿರನ ಕನವರಿಕೆ....

ಬೆಳ್ಳಂಬೆಳ್ಗಿರೋ ಬಿಳಿ ಹಾಳೆ ತಕ್ಕಂಡು

ಪಕ್ಕದ್ಮನೆ ಇಮಲಕ್ಕನ್ ಮಗಿಂತವ

ಪೆನ್ಸಿಲ್ ಇಸ್ಕಂಡು ಬರಿಯಕ್ ಕುಂತ್ಕಂಡ್ರೆ

ಮಾತಾಡದ್ನೇ ಮರ್ತೋಗಿರೋ ನಮ್ಮೂರ್ ಮೂಗ್ನಂಗೆ

ಬರೆಯೋಕ್ಮುಂಚೇನೇ

ಪದಗಳೆಲ್ಲಾ ಮರ್ತೋಯ್ತವೇ...

ಬಸ್ಸಾರು ಮುದ್ದೆ ಉಂಡ್ಬುಟ್ಟು

ಕಣ್ಣೆಳ್ದಂಗಾಗಿ ಮುಕ್ತ ಧಾರಾವಾಹಿಯ

ನೋಡೋದ್ಬುಟ್ಟು

ಚಾಪೆ ಮ್ಯಾಲುಳ್ಕಂಡು ನಿನ್ನೊಂದ್ ಕಿತ ನೆನ್ಕತ್ತಿದ್ದಂಗೆ

ನಿದ್ದೋಗ್ ಆಕಾಸ ಸೇರ್ಕಂತದೇ

ಬೆಳಗಾನ ಸಿವ್ರಾತ್ರಿಯಾಯ್ತದೆ..

ಅರೆಕಲ್ಲತವಾ ಎಮ್ಮೆ ಮೇಸ್ಕಂಡು

ವೊಂಗೆ ಮರುದ್ ನೆಳ್ಳಲ್ಲಿ ತೂಕಡಿಸ್ಕಂಡ್

ಕುಂತಾಗ... ಕನಸೊಂದ್ ಬಿದ್ದಂಗಾಯ್ತದೆ

ಕನಸ್ನಾಗೆ ಬ್ಯಾರೋನ್ ಜೊತ್ಗೆ ನಿನ್

ಮದುವ್ಯಾದಂಗಾಯ್ತದೆ...

ಬೆಚ್ ಬಿದ್ದು... ಎಚ್ರಾಗಿ

ಹಟ್ಟಿತಕ್ ಬರೋದ್ರೊಳ್ಗೆ

ಚಳಿಯಿಡ್ದಂಗಾಯ್ತದೆ,

ಸಂಜಿಗ್ ಜರ ಬಂದಂಗಾಯ್ತದೆ...

ಎದೆ ಕಿವುಚ್ದಂಗಾಯ್ತದೆ...

ನಿನ್ನೇ ನೆನ್ಕಂಡ್ ಜೀವ ವೋದಂಗಾಯ್ತದೆ...